|
O BNG manifestou a sua satisfacción tralo “ascenso electoral” acadado na Comarca do Condado, logo das eleccións do 9 de marzo, onde case 6.500 veciños apoiaron ao partido. Os nacionalistas, a través da súa responsábel comarcal Sandra Arauxo, destacan que “nun contexto moi difícil e complicado de bipartidismo entre as dúas forzas estatais”, o BNG “foi capaz de consolidar e avanzar electoralmente”, conseguindo lograr dous deputados nacionalistas.
Arauxo suliña ademais que “o medre nacionalista” no Condado e os seus concellos estivo “por enriba da media galega” e destaca avances de catro puntos en Salceda e Salvaterra ou de dous en Mondariz, Ponteareas ou nas Neves. No conxunto da comarca, na que o BNG inclúe Salceda e O Porriño, os nacionalistas lograron case 1000 votos (exactamente 917) máis que en 2004. Os nacionalistas tamén consideran positivo “o retroceso” do Partido Popular en todos os concellos da comarca.
En O Porriño, en comparación ao ano 2004 o PP tivo 4.948 votos (67 votos menos), o PSOE 3.789 (máis 410 votos) e o BNG 1.396 (43 votos menos). En Salceda, os populares conseguiron 2.463 votos, os socialistas 1.300 votos e os nacionalistas 880 votos. En Mos, 4.173 persoas votaron o PP, 3.875 votos foron para o PSdeG e 1.199 para o BNG.
|
