|
As Xornadas Técnicas sobre
Accesibilidade e Arquitectura en Centros Históricos: Solucións Mecánicas
comezaron esta mañá con grande éxito de participación. 105 persoas participaron
no ciclo de conferencias que organiza o Consorcio do Casco Vello de Vigo
–participado pola Consellería de Vivenda e Solo nun 90 por ciento e polo Concello de
Vigo nun 10 por ciento.
O prestixioso urbanista foi o
primeiro en intervir cunha conferencia ao redor do Estudo sobre Mobilidade que
se realizou para achar solucións no casco vello de Vigo. Nebot avogou por
superar vellos tópicos como a peonalización ou o seu contrario o aumento de
carrís para o tráfico rodado. En palabras do arquitecto, a alternativa é fuxir
dos guetos e crear espazos de convivencia entre automóbiles e peóns. Esta
aposta concretaríase en carrís de tránsito lento e beirarrúas axeitadas para o
paseo.
Nebot considera preciso que dentro
das cidades se busque a continuidade destas propostas para que non haxa illas
de atención aos peóns arrodeadas por un mar de dominio absoluto dos vehículos,
con beirarrúas estreitas ou paseos mal acondicionados.
A respecto de Vigo, o urbanista
avogou por converter o eixo da rúa Elduayen (que fai de fronteira entre as
zonas alta e baixa do casco vello) nunha arteria de comunicación onde convivan
os vehículos e os camiñantes, mellorando o acceso entre ambas as zonas e
dificultando a velocidade rodada. Tamén Nebot recomendou a construción de
solucións mecánicas para sortear as pendentes do centro histórico. Tres
ascensores, na súa opinión, mellorarían moito a mobilidade e a accesibilidade.
As xornadas inauguráronas o
presidente do Consorcio do Casco Vello de Vigo e tenente alcalde de Vigo,
Santiago Domínguez; a directora xeral de Fomento da Calidade da Vivenda,
Encarna Otero, e o presidente da delegación de Vigo do Colexio de Arquitectos
de Galicia, Salvador Fraga.
Domínguez falou do compromiso do
consorcio e do Concello de Vigo por rehabilitar dunha maneira integral o centro
histórico e comprometeu o apoio de ambas as institucións para levar adiante as
solucións precisas de cara ao próximo futuro.
Otero salientou a necesidade de que
nos procesos de rehabilitación se teñan en conta diversos factores e os
traballos de recuperación estean diversificados e se acometan a un tempo. A
directora xeral afirmou que o compromiso da Consellería de Vivenda e Solo vai
máis alá de poñer en valor os inmobles do centro histórico.
Fraga defendeu o valor da
arquitectura en Vigo e a necesidade de que a relación entre urbanismo e
dinamismo social volvan á harmonía que viviron no pasado da cidade.
A partir das 16.30 horas seguen as conferencias.
Despois da intervención de Nebot, Javier Ollero, redactor do Plan Especial de
Planeamento e Recuperación Interior do Casco Vello de Vigo, guiou un paseo polo
centro histórico da cidade. | 
