|
Esta é a última semana na que permanecerá aberta ao público no MARCO, Museo de Arte Contemporánea de Vigo, a exposición ‘PAIXÓNS PRIVADAS, VISIÓNS PÚBLICAS. Coleccións D.O. Galicia’, unha selección de fondos de coleccións privadas de arte contemporánea de Galicia, que fora inaugurada o 30 de maio nas salas do primeiro andar, e que se clausura este domingo 7 de setembro.
A través da selección realizada polo profesor e crítico de arte Fernando Castro Flórez, comisario da mostra, PAIXÓNS PRIVADAS, VISIÓNS PÚBLICAS presenta un amplo conxunto de obras que, dende os anos oitenta ata o presente, que axuda a facer un percorrido pola historia da arte e do coleccionismo máis próximo. Máis alá da simple exhibición das obras, a exposición intenta analizar as súas particularidades e as relacións entre os seus contidos, funcionando como homenaxe e posta en valor destas coleccións. A mostra reúne un total de 115 pezas, na súa maioría pinturas, esculturas e fotografías, ademais de instalacións, vídeos, debuxos e maquetas, e supón un primeiro achegamento cara ao coleccionismo privado en Galicia, situando á vista do público obras que ata agora permanecían ocultas. |
