|
Preto de 20 compañías encherán de cor e humor as rúas de Vigo durante a celebración do Mundoclown, que comeza este xoves día 31 de xullo e que se estenderá ata o 3 de agosto. A Praza da Constitución, a rúa Príncipe e o paseo do Calvario concentran o groso da programación, aínda que o Auditorio do Concello acollerá a actuación especial de Jango Edwards prevista para o venres día 1 de agosto ás 22 horas.
Da mañá á noite, o público de todas as idades poderá asistir ás funcións do Mundoclown. Antes do mediodía, ás 12, e ás 13 horas haberá pases de Maraclown, actividade que se retomará ás 18, 19, 20 e 21 horas do serán. No que respecta ao Certame, os espectáculos serán ás 20.30 horas de xoves a sábado, e conta ademais nesta xornada con outro pase ás 19.00 e ás 22 horas do domingo.
Nanny Cogorno, Capitán Maravilla e Good Idea Company serán algúns dos participantes no Certame Intergaláctico. No que respecta ao Maraclown, colaborarán 13 compañías da máis diversa procedencia.
Segundo o director artístico do Mundoclown Vigo 2008, Iván Prado, o Mundoclown, organizado polo Concello de Vigo, patrocinado por Caixa Galicia e xestionado por Coperactiva Cultural, "é a avanzadilla do Festiclown" e renderá homenaxe ao "mellor clown que pasou por Galicia", Carlo Colombaioni.
Así, dentro da programación do festival, o sábado 2 de agosto ás 22.30 horas, a Praza da Constitución acollerá a celebración dunha gala-homenaxe a quen foi o introdutor do pallaso moderno nos teatros e padriño do Festiclown. Artistas coma Jango Edwards, Cristina García, de Las Pestañas, Claudia Contín, Nanny Cogorno, Capitán Maravilla, Os Colombaíños, Os 7 Magníficos + 1 e Popín actuarán para lembrar a quen foi mentor dalgunhas destas compañías.
Por outra banda, o festival non esquece o seu carácter solidario, e por iso celebrará o domingo 3 de agosto ás 20 horas na Praza da Constitución a Gala Maraclown Solidario, co obxectivo de recadar fondos para a realización dunha caravana de Pallasos en Rebeldía aos Municipios Autónomos Zapatistas de Chiapas, en México. Ademais, proxectarase o documental 'Caminando las risas' e presentarase Pallasos en Rebeldía o xoves 31 de xullo ás 22 horas na Aula de Conferencias Fundación Caixa Galicia, en Vigo. |
