|
Volvemos ao medo como método para educar, agora tamén na estrada. A Semana Santa rematou en Galicia cun reconto tráxico: 3 vítimas mortais en accidentes de tráfico. Hai quen ve no balance final a oportunidade de destacar o descenso do 70% respecto ao ano pasado: nas mesmas datas, despedíronse máis mortos.
O responsable da Garda Civil de Tráfico en Galicia, José Luis Ulla, apunta a que o medo (ai, o medo) dos condutores a pasaren un retiro na cadea foi unha das principais causas da redución dos accidentes no asfalto. A clave estaría para el na reforma do Código Penal, que agora considera como delitos as infraccións máis graves contra a seguridade do tráfico.
Pero cantas persoas evitan un adiantamento perigoso pensando en que os seus ósos poden ir parar á cadea? Botando hipóteses ao aire non nos gaña ninguén, por iso hai quen tamén se pregunta se non sería posible coñecer o número real de desprazamentos de coches rexistrado na semana da ponte. Daquela, poderiamos calibrar o peso real do medo a ir ao cárcere ou do carné por puntos na conciencia dos condutores.
Pola contra, se tomase corpo o presentimento de que os automóbiles se moveron menos este ano por mor da carestía dos carburantes e da vida en xeral, nin as campañas de concienciación da DXT, nin a aplicación do Código Penal aos condutores nin tampouco o carné por puntos poderían levar a triste gloria do descenso no número de mortes.
Pero o máis importante é, ao cabo, buscar a forma de concienciarnos do interese de levar a cabo unha condución segura para nós mesmos e para os demais. Neste punto, hai quen lle augura á represión pouco éxito a longo prazo e, polo contrario, unha vida longa á formación continua dos condutores. |
