| O Plan de Seguros Agrarios Combinados de 2008 ampliará quince días
máis o prazo de cobertura para os produtores de kiwis, afectados en
novembro do pasado ano por unhas xeadas excepcionais para esa época.
Así o anunciou o pasado 7 de febreiro o Sindicato Labrego Galego (SLG)
nun comunicado.
Esta modificación permitirá aos titulares de explotacións de kiwi
ter un aval para as súas colleitas ata o 30 de novembro e non ata o 15,
como estaba establecido ata a data. A organización agraria
nacionalista, satisfeita coa medida, recorda que xusto o undécimo mes
do ano é cando o kiwi alcanza os seus niveis óptimos de azucre e
materia seca e, xa que logo, a calidade idónea para a súa
comercialización.
O SLG asegura, no entanto, que continúa traballando para definir
convenios entre as asociacións de produtores de kiwi e a Consellería de
Medio Rural para mellorar a produtividade nas explotacións, a formación
dos agricultores e a potenciación económica e comercial desta froita.
20 toneladas por hectárea
As fortes xeadas dos días 16 e 17 de novembro provocaron importantes
danos nas colleitas de 65 explotacións de toda Galicia, aínda que as
maiores incidencias centráronse na comarca pontevedresa do Baixo Miño,
que produce o 45% do kiwi cultivado en España.
As baixas temperaturas supuxeron a perda de 534 toneladas nunha
superficie de 26,8 hectáreas. Esta situación foi especialmente grave
para oito explotacións que acusaron danos no 100 por cen das súas producións.
En suma, 116 toneladas que se cultivaban en 5,8 hectáreas.
No caso doutras 21 explotacións, as perdas alcanzaron ao 40 por cento da súa
produción e viron minguadas así 318 toneladas de froita, que ocupaba 16
hectáreas. Outras 36 explotacións rexistraron estragos nun 20 por cento da súa
produción, perdendo 100,68 toneladas que crecían en 5 hectáreas de
superficie.
As estimacións de Medio Rural situaron nunha media de 20 toneladas
perdidas por cada hectárea naquelas zonas onde máis intensas foron as
xeadas.
| 
