|  | | | | | Foto de familia de los premiados. REMITIDA | | | |
A Deputación de Pontevedra concedeu onte á empresa Froiz a Medalla de Ouro da Provincia no acto celebrado no Pazo Provincial e entregou mencións honoríficas ás traxectorias distinguidas de Alejandro Gómez, Alfonso Vilar, a Asociación San Francisco, o Parador Conde de Gondomar de Baiona e a empresa Extrugasa nas categorías de Deporte, Cultura, Acción Social, Turismo e Empresa respectivamente.
Con este galardón, a Deputación sobresae a traxectoria do Grupo Froiz, representado na persoa do seu fundador e presidente, Alfredo Magín Froiz, "polo seu carácter emprendedor, pola súa calidade e competitividade, e pola indubidable vocación social da empresa", afirmou o presidente provincial, Rafael Louzán.
Un grupo empresarial que hoxe factura preto de 460 millóns de euros, dá emprego a máis de 4.000 traballadores e conta con 240 puntos de venta en toda España, que conta con capital enteiramente galego e figura entre as vinte primeiras empresas do sector da alimentación e da distribución en España, sendo ademais a segunda de Galicia. "Pero, máis alá da súa dimensión e dos seus niveis de facturación e ocupación, —destacou Louzán— Magín Froiz soubo manter un forte compromiso co seu entorno social e económico máis directo, pois ven mantendo, dende fai anos, unha loubable colaboración en proxectos deportivos, culturais, educativos, lúdicos e solidarios".
No apartado de premio Traxectoria distinguida, a Deputación recoñeceu o labor social da Asociación Galega San Francisco de Vigo, entidade que o longo de corenta anos ven adicándose ó tratamento ininterrompido das persoas afectadas con discapacidade intelectual e sensorial.
En Deportes, o premio Provincia de Pontevedra deste ano foi para o atleta vigués Alejandro Gómez Cabral porque "o seu brillante currículo é a proba máis evidente de que no deporte, como na vida, o esforzo para acadar unhas metas tén sempre unha recompensa", dixo Louzán. "En Alejandro Gómez, —sinalou— premiase non só unha esforzada e exitosa carreira profesional, que o converten nun dos deportistas máis importantes da provincia de tódolos tempos, senón tamén a todo un símbolo e un exemplo do deporte provincial".
No eido empresarial, o Premio foi acadado pola firma Extrugasa, do Grupo Quintá, polo seu grande desenvolvemento empresarial. A empresa, que facturou 110 millóns de euros en 2007, é modelo da cultura emprendedora da provincia, da mellora da competitividade empresarial, da implicación da empresa na sociedade e "da certeza de que, hoxe, nun mundo de economía globalizada, a calidade é un requisito imprescindible para competir e aínda para sobrevivir".
Máis premios
O premio Provincia de Pontevedra, no apartado do Turismo, outorgóuselle ó Parador Condes de Gondomar de Baiona. A Deputación valorou nel o seu papel de "punta de lanza" da oferta hoteleira de calidade e a súa decisiva contribución a que Baiona e as Rías Baixas sexan hoxe un referente nacional e internacional do turismo de excelencia e calidade. Dende a súa implantación na vila real en 1966, o Parador Condes de Gondomar é un buque insignia de Baiona e da Rede Nacional de Paradores.
Finalmente, no eido cultural, o Premio da Provincia foi para o escultor Alfonso Vilar, artista becado pola Deputación, quen ademais é o escultor galego que elaborou o maior número de monumentos públicos adicados ós homes e costumes de Galicia. "O seu continuo esforzo e a súa vocación por preservar a cultura e as sinais de identidade de Galicia no patrimonio público e na escultura son as razón polas que se lle outorga este galardón".
Un recoñecemento merecido, en verbas do presidente, posto que todos os premiados "son fieis representantes do que é a sociedade pontevedresa. Unha sociedade que ofrece oportunidades a todos os que veñen a buscalas, una sociedade integradora, que se converteu, por propios méritos, no motor económico, social e cultural de Galicia".
|
