|
O Núcleo de Sostibilidade da "Comarca de Pontevedra" formada polos concellos de Barro, Poio, Ponte Caldelas e Vilaboa, é o resultado dun convenio de colaboración entre a Asociación de Desenvolvemento Rural Proder II "Comarca de Pontevedra" e a Consellería de Medio Ambiente e Desenvolvemento Sostible. Neste marco, estáse a promover a participación cidadá no proceso de elaboración da Axenda 21 Local a través da organización de catro mesas de traballo nas que estarán convocados os principais axentes representativos do municipio. Esta iniciativa forma parte dun proxecto, no que a Comarca de Pontevedra -ao igual que outros concellos galegos- denomínase "Núcleos de Sostibilidade".
Segundo un comunicado da organización, o obxectivo dos Núcleos de Sostibilidade é realizar unha serie de actividades para contribuír ao proceso de desenvolvemento sostible, é dicir, acadar un crecemento económico coa maior igualdade social posible, coidando e mellorando ao mesmo tempo o medio ambiente.
Para desenvolver a Axenda 21 é un labor prioritario a creación de canles de participación cidadá, para que todos os actores sociais participen no proceso da toma de decisións. O obxectivo das mesas será o intercambio de opinións sobre os principais problemas ambientais e socioeconómicos nos municipios, de tal forma que xurdan propostas de mellora, que se deberán priorizar dende os concellos.
Por este motivo A Comarca de Pontevedra porá en marcha as mesas de participación, ás que poderán asistir todos os cidadáns interesados.
Vanse celebrar 4 Mesas de participación no Casal de Ferreirós, no concello de Poio:
- Día 8 de xullo, Mesa Empresarial (Industria, Construcción, Turismo e Comercio) ás 19.30 horas.
- Día 9 de xullo, Mesa de Mar e Terra (Mar, Forestal, Comunidades de Montes, Agricultura e Gandería) ás 20.00 horas
- Día 10 de xullo, Mesa Municipal-Comarcal (técnicos municipais e representantes dos partidos políticos) ás 10.00 horas
- Día 10 de xullo, Mesa Poboacional (Educación e Asociacións), ás 19.00 horas | 
