|
O vicepresidente da Deputación de Pontevedra, José Juan Durán, reuniuse esta semana con representantes da Asociación Titerescola que, por décimo noveno ano consecutivo, dirixíanse á institución provincial para presentarlle un avance do proxecto da campaña ‘Os títeres na escola 2008’, que pretende acoller a todas as compañías profesionais de títeres que teñen acreditado o seu enderezo fiscal na provincia de Pontevedra. Durán analizou a posibilidade de ampliar a oferta do proxecto para o vindeiro ano 2009, debido ó éxito desta importante iniciativa.
Dentro destes criterios de profesionalidade, considérase non só os de orde puramente fiscal senón tamén a traxectoria das compañías. Desde hai xa bastantes anos as empresas de teatro títeres da provincia teñen acreditado un alto nivel de calidade artística, recoñecido tanto a nivel autonómico como estatal. Agrupacións de renome como Artello, Viravolta, Títeres & Gualtrapas, Spaghetti, Tanxarina ou Miro Magariños, entre outros.
Tras dezaoito edicións ininterrompidas, a Campaña ‘Os títeres na escola’ tense convertido nun referente, non só a nivel galego, senón de toda a Península para o mundo do ensino na súa relación co teatro de títeres. Así o acreditan ás innumerables consultas e peticións recibidas por parte dos departamentos de Educación ou Cultura de concellos interesados en participar na campaña, mesmo dispostos a se desprazaren cos rapaces a outros concellos para poder asistir ás funcións.
A organización da campaña, como en edicións anteriores, correrá a cargo dunha comisión organizadora, formada pola directiva da Asociación Titerescola, en colaboración cos responsables dos respectivos concellos e das compañías. As datas, locais e horarios fíxanse de común acordo entre as partes citadas, con arranxo ós devanditos criterios.
|
