|
A Xunta de Goberno da Deputación aprobou a sinatura dun convenio de colaboración dotado con 10.000 euros coa Asociación de Apoio ás Vítimas de Delitos Violentos e os seus Familiares (AVIDEV), que terá por obxecto colaborar económicamente no financiamento dun avogado para dar reposta a cuestións xurídicas, un psicólogo para o apoio as vítimas e os seu familiares, e un asistente social.
Tal e como explicou o vicepresidente, José Manuel Figueroa, “no 2007 a asociación desenvolveu un intenso traballo de asesoramento e orientación a sete familias (15 persoas aproximadamente en total) que teñen sufrido delitos violentos”. A colaboración entre a institución provincial e AVIDEV estableceuse por vez primeira no 2006, dende este momento e por mediación da Deputación de Pontevedra, esta Asociación ten á súa disposición os servizos dun psicólogo, un avogado e máis un asistente social.
A Asociación de Apoio ás Vítimas e Familiares de Delitos Violentos creouse no ano 2004 por 17 familias que sufriron a desaparición ou morte dos seus seres queridos para axudar, defender, apoiar e asesorar ás vítimas e familiares de delitos violentos.
Por outra banda, aprobouse a sinatura dun convenio de colaboración coa Asociación Galega de Xogadores de Azar (AGAJA), a través do cal destinará 3.000 euros que posibilitan a contratación da asistencia psicolóxica profesional.
Segundo informou o vicepresidente, José Manuel Figueroa, “AGAJA desenvolve actividades de prevención, información e tratamento integral, con persoal voluntario e contratado”, no seu local de Vigo polas tardes de luns a venres. No 2007 a asociación desenvolveu 480 terapias psicolóxicas, 2 talleres de relaxación, 12 reunións de coordinación co equipo terapéutico, e 2 xornadas formativas de dous días cada unha dirixidas ós monitores. En total, no 2007 foron atendidas 130 persoas con problemas de adiccións.
AGAJA é unha asociación que ten máis de 15 anos de historia e que foi impulsada por 15 xogadores en rehabilitación, os seus familiares e co asesoramento dunhas psiquiatra e tres psicólogas. Dende o seu nacemento ven traballando como centro de tratamento para o xogo patolóxico, aínda que tratan outras adiccións como a compra compulsiva, a adicción a internet ou a teléfonos móbiles.
| 
