|
Expertos, técnicos e poñentes participantes no I Simposio Iberoamericano de Horticultura Ornamental, que remata este venres en Pontevedra, coinciden en que moitas das especies invasoras que afectan á flora autóctona entraron na nosa comunidade a través da man humana como plantas ornamentais. Segundo explicou hoxe a presidenta do comité organizador, Carmen Salinero, especies como a 'Gledisia' e o 'Ailantus' son exemplos clarísimos de prantas que entraron a través da xardinería e hoxe son especies invasoras moi difíciles de controlar. "Ocorre que ó chegar á nosa terra, estas plantas atopan un clima e un ambiente diferente que lles fai actuar cun comportamento invasor que afecta á diversidade autóctona a causa da súa propagación".
Precisamente, os poñentes Jesús Izco Sevillano do departamento de Botánica da USC; e María Dalila Espirito Santo do Jardim Botânico da Ajuda, da Universidade Técnica de Lisboa, coincidiron nesta tese nas súas exposicións públicas e ademais de alertaron sobre o uso inadecuado de plantas foráneas". Unha das consecuencias producidas por esta redistribución de especies, segundo apuntou Carmen Salinero, "é a transmisión de pragas". Segundo comentou "moitas das plantas foráneas introducidas xeran enfermidades e pragas que non afectan ó noso ecosistema pero que como se desenvolven nestas plantas poden, transmitirse ás especies autóctonas".
Neste senso, a presidenta do comité organizador do I Simposio Iberoamericano de Horticultura Ornamental comentou que "debemos utilizar as nosas especies autóctonas que, ademais "están a acadar cada vez máis valor". Un exemplo son as "Ericas" que hoxe en día están en todos os viveiros do mundo como plantas de maceta, e son plantas procedentes dos nosos montes, ocorre o mesmo cos "fentos" e outras moitas plantas".
Outro dos puntos importantes abordados este xoves no I Simposio Iberoamericano e nas IV Xornadas de Horticultura Ornamental foi o relacionado co uso eficiente da auga en xardinería. Un importante número dos participantes neste foro proceden da zona mediterránea e do sur de Portugal, onde o uso responsable e eficiente da auga constitúe un dos grandes problemas á hora de conservar as plantas porque se trata dun recurso escaso.
O doutor Pére Cabort Roig, do departamento de Xenética Vexetal de IRTA-Cabrils (Barcelona) comentou precisamente hoxe que "a auga é un ben cada vez máis escaso nas zonas de clima Mediterráneo". Considera que "hai que cambiar o concepto de área verde e deseñar pensando con que auga regaremos e tamén de canta disporemos".
| 
