|  | | | | | Pablo Carrera, director do Museo do Mar. | | | |
O Museo do Mar de Galicia, situado na parroquia viguesa de Alcabre, reabriu as súas portas o pasado mes de decembro cunha mostra integrada por 400 pezas con maquetas, aparatos relacionados co medio mariño, fotografías, documentos sonoros ou vídeos. Nesta nova etapa, o director do Museo, Pablo Carrera (Vigo, 1963) subliña o desexo de converter as instalacións museísticas viguesas nun "centro de referencia no noroeste peninsular dentro do ámbito mariño".
Pregunta.- ¿Como afronta o Museo do Mar esta nova etapa?
Resposta.- Cheo de proxectos. Temos que desenvolver as liñas prioritarias de actuación que son a recollida de patrimonio marítimo galego vinculado ás partes que nós consideramos fundamentais: aquelas máis ligadas á arqueoloxía industrial, especialmente o patrimonio do século XX que estimamos que é o que está cun nivel de ameaza superior, xa que son pezas que cando deixan de ser utilizadas pasan directamente ao desguace.
P.- ¿Cales son os grandes atractivos do Museo?
R.- O entorno privilexiado, ante todo, e a exposición permanente do Museo, que é moi atractiva e visual porque contempla pezas grandes con outras máis pequeniñas.
P.- ¿Que expectativas teñen respecto a número de visitantes?
R.- As expectativas son bastante boas. Hai un público contento coa actuación que é o que ten a memoria do mar, xente que directa o indirectamente está ligada co mar. É un discurso moi próximo, entendible e ben tratado, polo que ese público está encantado. Os de fora apostan máis polo Acuario, que é o que máis lles chama atención.
P.- ¿Que retos de futuro ten o Museo do Mar?
R.- Nós queremos ser o centro coordinador en actuacións de patrimonio marítimo galego. Hai que ter en conta que somos un país que ten unha diversidade patrimonial importante con respecto a outros, máis que nada porque temos unhas influencias clarísimas do Mediterráneo e tamén do Atlántico que nos fai estar nunha situación privilexiada. Temos unha riqueza patrimonial importantísima con respecto a outros países.
P.- ¿Cre vostede que aínda queda moito por descubrir nos nosos mares?
R.- Temos un patrimonio vastísimo, tanto propio como polos contactos. Galicia sempre foi un sitio de chegada e de saída. Estratexicamente estamos moi ben situados entre o Mediterráneo e o Atlántico, con portos naturais difíciles de atopar de aquí hacia o sur. Isto sempre favoreceu os intercambios marítimos. O noso patrimonio está por descubrir.
P.- Como experto en patrimonio ¿Canto hai de mito e canto de realidade no tema dos Galeóns de Rande, afundidos na ría de Vigo?
R.- Os galeóns están aí. A nivel naval houbo unha batalla importantísima polos tamaños das flotas contendentes. Hai unha historia real, dun tesouro que se desembarcou aí e proveeu de moitos cartos á Coroa Española. A partir de aí o que temos é un escenario dunha batalla que aconteceu hai 300 anos, os restos están enterrados a diversas profundidades con entre 12 e 13 metros de lodos, acceder a eles é difícil, sobre todo si se quere acceder con garantías de resultados arqueolóxicos. As expedicións arqueolóxicas marítimas son caras. | 
