|
Expourense será a anfitriona do 9º Congreso Internacional de Feiras Iberoamericanas, UNIFIB, que se celebrará entre os días 24 e 26 de abril. Baixo o lema “As feiras como pote de cooperación internacional”, reuniranse en Ourense ó redor de 150 directivos dos recintos feirais e de empresas vencelladas coa organización de feiras, congresos e eventos de España, Portugal e América Latina.
Segundo fontes de Expourense, este congreso será un punto de encontro profesional que conta cun programa científico que abordará a actualidade feiral dende distintas perspectivas: situación do mercado en América Latina e en Europa, organización de feiras por parte de empresas privadas, promoción, marketing, medioambiente, etc.
Este programa contará coa participación, entre outros, do Ministro de Turismo do Salvador, José Rubén Alonso Rochi, e dos presidentes das asociacións de recintos feirais de España, Portugal e América Latina, así como dos directivos das principias empresas organizadoras de eventos a nivel mundial. Outro dos relatores do Congreso será o empresario viticultor no Ribeiro e director e produtor de cine, José Luis Cuerda.
Pero o 9º Congreso Internacional de Feiras supón ademais unha magnífica oportunidade para que estes directivos de recintos, que son prescritores de opinión as súas respectivas cidades epaíses, poidan coñecer os recursos económicos e turísticos tanto de Ourense como de Galicia e promocionalos posteriormente nos seus lugares de orixe.
Para elo, Expourense ten organizado un completo programa de lecer que, centrado en destacar o potencial termal da cidade con visitas previstas as súas principais áreas termais, exalta ademais os principais recursos da provincia como é o caso do vino, a arquitectura ou a moda. Así, este programa inclúe a visita ás comarcas de O Ribeiro e da Ribeira Sacra onde, ademais, poderán realizar unha ruta polos mosterios de San Clodio, San Estevo de Ribas de Sil e San Pedro de Rocas. Esta delegación realizará ademais unha visita ás instalación que Roberto Verino ten na Tecnópole.
Será esta a novena edición dun congreso bienal que se celebra durante os anos pares e no que se alterna continente, isto é, ten lugar unha edición en América Latina e outraen Europa. A cidade de Talca, en Chile, foi a última sede en 2006 deste Congreso e, a anfitriona deste ano 2008 será Ourense.
Este 9º Congreso dispón dun portal de Internet, www.unifibourense2008.es, no que se poden consultar tódolos programas, actividades e novidades relativas ó mesmo.
¿Qué é UNIFIB?
A UNIFIB (Unión Internacional de Ferias Iberoamericanas) está integrada pola Asociación Española de Ferias, AFE, pola Asociación Portuguesa de Feiras e Congresos, APFC, e pola Asociación Internacional de Ferias de América, AFIDA. Constituise formalmente durante o II Congreso de Feiras Iberoamericanas, celebrado en San Salvador (El Salvador) en 1994.
|
