|  | | | | | Un dos participantes do concurso. | | | |
A segunda edición do concurso Spelling Bee, organizado por
Schoolhouse co patrocinio do Concello de Vigo, deu comezo esta tarde no
Auditorio do Colexio Salesianos coa celebración da primeira semifinal, que
contou coa participación de 60 nenos de dez colexios de Vigo e un de O Porriño.
O concurso, que consiste no deletreo de verbas en inglés, procura
concienciar aos estudantes e ás familias da relevancia da ortografía como
aspecto fundamental no proceso do aprendizaxe dunha forma divertida e lúdica. O
obxectivo final da iniciativa pasa por adquirir un axeitado coñecemento do
inglés. Nesta semifinal concursan estudantes dos centros vigueses Compañía de
María, Rosalía de Castro, Montecastelo, Santo Tomé, Santa Irene, Salesianos,
Carlos Casares, Alexandre Bóveda e os colexios Estudio e Alborada, xunto co
Instituto Pino Manso de O Porriño.
As rondas clasificatorias
Os sesenta rapaces que participaron esta tarde na primeira semifinal do
concurso tiveron que pasar unha primeira ronda eliminatoria nos seus
respectivos colexios, proba de redación elaborada polos seus profesores de
inglés xunto coa organización do evento. Entre cinco e dez alumnos foron os
escollidos para representar a cada centro educativo, ao seren os que menos
erros tiveron no ditado de cen palabras na lingua anglosaxona.
Nas semifinais o deletreo é oral, e os rapaces son divididos en grupos
de dez, dos que ata un máximo de tres poden pasar á gran final, en función do
número de participantes. Cada concursante conta cun minuto no que pode
deletrear a palabra varias veces, sendo a última dentro do tempo a resposta
definitiva. O alumno será avaliado por un xurado composto por dous membros de
Schoolhouse e un profesor representante dos colexios participantes.
O gañador/a viaxa a Canadá
A audiencia pode seguir o concurso nas pantallas habilitadas ao efecto
no Auditorio, nas que se proxectará a verba en inglés e mais o seu significado
en español. Pantallas e xurado estarán presentes tanto nas semifinais como na
final, na que participarán un total de 20 ou 30 escolares. Na derradeira ronda,
o concursante só contará cunha oportunidade de resposta no minuto de tempo,
ainda que pode solicitar que se lle repita ata tres veces o termo, que se lle
explique o significado do mesmo e incluso que sexa usado nun contexto.
Todos os participantes que cheguen á final recibirán unha medalla e un
agasallo da organización. Os cinco mellores terán un premio especial e o
gañador volará a Canadá de viaxe de estudos. Do mesmo xeito, os colexios e os
profesores dos tres primeiros clasificados terán tamén premios especiais. |
