| Caixanova deu a coñecer esta mañá o fallo da primeira edición do
Premio Literario Escolar, convocado pola entidade co obxectivo de
promover a creación literaria no ámbito escolar, ao amparo do
inestimable labor dos profesores que animan ao pracer da lectura e da
escritura.
O presidente de Caixanova, Julio Fernández Gayoso, e o presidente do
xurado, Francisco Castro, foron os encargados de dar a coñecer a
resolución nun acto que tivo lugar no Centro Social Caixanova en Vigo.
O crítico literario Ramón Nicolás Rodríguez, o escritor de literatura
infantil e xuvenil Agustín Fernández Paz e o xornalista e escritor
Álvaro Otero completaron a composición do tribunal que se encargou de
seleccionar os traballos gañadores.
Sofía Lorenzo Páramos, do IES Ribeira do Louro (Porriño), foi a
gañadora do premio na categoría de primeiro ciclo da ESO polo traballo
“Un regalo sorprendente”, avalado pola súa profesora Sara Costa
Tenorio. O presidente do xurado destacou o argumento da obra, que
aposta claramente polo valor da lectura xa que se centra nunha rapaza
que agarda como regalo un libro, e non unha consola de videoxogos ou
unha televisión, algo máis habitual na actualidade.
Na categoría de segundo ciclo da ESO resultou premiada Lucía Barrera
López, do IES Perdouro (Burela), polo poemario “No ocaso do mar.
Sensacións para un tempo vivo. Retrincos do maxín”, avalado pola
docente Edelmira Parga Valiña. Segundo explicou Francisco Castro o
xurado quedou sorprendido pola madurez da obra, así como polo sentido
do ritmo e o uso dun amplo vocabulario.
Por último, na categoría de Bacharelato, o xurado decidiu
outorgarlle o premio a Soná Nakhshon, estudante do IES Rosalía de
Castro (Santiago de Compostela), polo traballo “Lo poco que siempre
queda”, avalado pola profesora Ana Mª Platas. Francisco Castro afirmou
que se trata dun texto moi emotivo que nos leva a reflexionar sobre os
camiños da memoria e a importancia do amor.
As tres alumnas galardoadas recibirán un equipo informático completo e os seus profesores un ordenador portátil.
Á convocatoria presentáronse 152 obras procedentes de 56 centros
escolares das catro provincias galegas. Os colexios e institutos de
Pontevedra remitiron un 42,8% dos traballos, mentres que da Coruña
recibíronse o 35,5% das obras, de Ourense o 15,1% e de Lugo o 6,6%. |
