|
Co gallo da celebración do “Día das Letras Galegas 2008” El Corte Inglés de Galicia, a través dos seus Centros Comerciais de Vigo, A Coruña e Santiago de Compostela, en colaboración con Ámbito Cultural El Corte Inglés, ven de convocar o ‘X Concurso de Carteis Día das Letras Galegas 2008’. Segundo informou hoxe a empresa organizadora, o concurso vai dirixido a tódolos alumnos matriculados nun centro de ensinanza secundaria de Galicia que teñan entre 12 e 18 anos.
Os traballos, orixinais e inéditos deberán ser realizados en papel ou en cartolina, cunhas medidas máximas de 50x70 cm, e mínimas de 40x60 cm, en sentido vertical, empregando calquera tipo de procedemento creativo, pero respectando sempre os soportes sinalados.
Os traballos deberán ser realizados a título individual e obrigatoriamente deberán aludir o persoeiro a quen está adicado o Día das Letras Galegas 2008: Xosé María Álvarez Blázquez. A recepción dos traballos e a recollida das bases de participación faranse no Departamento de Relacións Externas dos Centros de El Corte Inglés de Vigo e de Coruña, e no Centro Comercial Compostela (Hipercor - Tiendas El Corte Inglés). O prazo de admisión pecharase o 3 de maio. Cos mellores carteis seleccionados farase unha exposición na semana conmemorativa do Día das Letras Galegas, nos respectivos Centros.
Haberá 3 primeiros premios que consisten nunha tarxeta regalo de El Corte Inglés de 300 euros máis diploma, e un lote de libros para os tres mellores traballos presentados en toda Galicia, elexidos como os gañadores das fases locais dos centros de Vigo, A Coruña e Santiago. De entre os tres seleccionados elixirase o gañador absoluto do concurso, que recibirá un trofeo, e o seu traballo converterase no cartel oficial e na imaxe corporativa das actividades programadas que conmemoren a celebración do Día das Letras Galegas nos Centros de El Corte Inglés en Galicia.
Tamén haberá tres segundos premios, e tres terceiros premios que consisten en tarxetas regalo de El Corte Inglés de 150 euros e 60 euros respectivamente, mais un lote de libros en tódolos casos.
Por último, premiarase o Centro Escolar que presente a mellor e maior labor de conxunto cun gran trofeo e unha tarxeta regalo de El Corte Inglés de 450 euros para a adquisición de material escolar. | 
