|  | | | | | Olaia Fernández Dávila, esta mañá na rueda de prensa. | | | |
A deputada do Bloque Nacionalista Galego (BNG) no Congreso, Olalla
Fernández Davila presentou esta mañá en rolda de prensa unha iniciativa
na Cámara Baixa na que reclama ao Goberno Central que dote “de vez” ao
Porto de Vigo dun Plan Director e outro de Utilización de Usos,
“obrigatorios e pasos previos necesarios para acometer calquera
ampliación”.
Davila subliñou que segundo o artigo 38 da Lei de Réxime Económico e
Prestación de Servizos dos Portos de Interese Xeral “a ampliación ou
realización de novas obras de infraestrutura que altere
significativamente a súa configuración requiriría a previa aprobación
do Plano Director de Infraestruturas do porto”. Asemade, salientou que
a lexislación tamén obriga a redactar un Plano de Utilización dos
Espazos Portuarios, así a definir as necesidades de cando menos 10
anos, a redacción dun estudo de impacto ambiental.
Neste sentido, a deputada do BNG considerou “sorprendente que a
Autoridade Portuaria nos sorprenda periodicamente con propostas de
ampliación do porto, de máis recheos na Ría, cando para acometer estas
obras son obrigatorios un Plano Director e outro de Usos que a día de
hoxe non existen”.
Ademais, Davila asegurou que “resulta incomprensible que un porto da
importancia do de Vigo sexa o único dos cinco de interese xeral do
Estado en Galicia que non conta cun Plano de Utilización de Usos”, a
pesar de que ten sido reclamado por representantes de entidades cidadás
e representantes políticos da cidade.
Neste senso, criticou que o Proxecto de Plano de Usos e Espazos
Portuarios presentado a finais de 2006 “non pasou da fase de alegacións
e neste momento descoñecemos a súa situación administrativa”. Por iso,
Davila considerou “pouco serio que os novos responsábeis políticos do
Porto de Vigo volvan a anunciar, unha vez máis, proxectos de
ampliación”.
A deputada do BNG pedíulle explicacións ao Goberno pola ausencia dun
Plano de Utilización de Usos Portuarios do Porto de Vigo, que xa teñen
todos os restantes portos de interese xeral do estado en Galiza.
Tamén solicitou unha explicación pola “estraña situación de que a
Autoridade Portuaria de Vigo estea a anunciar proxectos de ampliación
cando non se conta cun Plano Director, obrigatorio para a ampliación ou
para calquera obra de infraestrutura que altere significativamente a
configuración do porto”.
Ademais, Davila pregúntouse “Se non existe un Plano de Usos, ¿como
se poden avaliar as necesidades para considerar necesaria a ampliación
do porto?”.
Por último, e entre outras cuestións, a parlamentaria nacionalista
solicítalle ao Goberno que aclare se contempla a posibilidade de levar
a cabo e executar proxectos de ampliación do Porto de Vigo sen que esta
infraestrutura dispoña dos correspondentes Plan de Usos e Director que
a lei establece como preceptivos”.
| 
