|
O Consello da Xunta aprobou onte, á proposta da Consellería de Vivenda e Solo, o Proxecto Sectorial e o Proxecto de Obras Públicas do Parque Empresarial de Tomiño, que contará cunha superficie de 540.000 metros cadrados situados no val do río Cereiro.
Este Departamento autonómico prevé un investimento total de 15,3 millóns de euros para o desenvolvemento desta actuación en materia de solo empresarial, así como o inicio das obras de urbanización no primeiro trimestre de 2009. Deste xeito, A Consellería de Vivenda e Solo ampliará a oferta de solo produtivo nesta parte do país, vinculada á área de influencia de Vigo.
Do total da superfície do Parque Empresarial de Tomiño -540.000 metros cadrados-, 294.200 metros cadrados serán destinados a uso empresarial, 129.600 a zonas verdes e a superficie restante destinarase, servizos, rede viaria e aparcadoiros. Ademais, realizaranse distintas actuacións para asegurar unha óptima integración paisaxística do parque no seu entorno. Desta maneira, as naves empresariais deberán ter un aspecto coidado dende o punto de vista arquitectónico, esixindo que tódalas medianas da edificación teñan o tratamento de fachada. Tamén se reporá o arborado con especias autóctonas e protexeranse os regatos existentes creando unha zona verde.
Neste momento, este Departamento autonómico está a redactar o Proxecto de Expropiación dos terreos necesarios para o desenvolvemento deste parque, para o que se destina un investimento de 88.900 euros.
A Consellería de Vivenda e Solo asumiu o desenvolvemento do Parque Empresarial de Tomiño o pasado mes de marzo, tras unha reunión celebrada en Madrid coa sociedade pública Suelo Empresarial del Atlántico (SEA), inicialmente encargada do desenvolvemento desta actuación.
| 
