|
A consellería de Vivenda e Solo contratou por 88.900 euros a elaboración do Proxecto de Expropiación para o desenvolvemento do Parque Empresarial de Tomiño sobre unha superficie de 540.000 metros cadrados. A empresa contratada dispón dun prazo de tres meses para a elaboración do proxecto, unha vez asinado o contrato.
Ao concurso público convocado pola consellería de Vivenda e Solo o pasado mes de xuño presentáronse un total de cinco empresas, resultando adxudicataria Lagares Ingeniería S.L. por formular a proposición máis vantaxosa no seu conxunto, tendo en conta que a mesa de contratación valorou a proposta económica, a planificación do traballo, o equipo humano dispoñible e a experiencia da empresa en actuacións similares.
Simultaneamente coa adquisición de terreos, Vivenda e Solo está tramitando o Proxecto Sectorial do Parque Empresarial de Tomiño, co obxectivo de acurtar prazos e iniciar as obras de urbanización no primeiro trimestre de 2009.
O Departamento autonómico prevé un investimento total de 15,3 millóns de euros para o desenvolvemento desta actuación en materia de solo empresarial, que ampliará a oferta de solo produtivo na área de influencia da cidade de Vigo.
Vivenda e Solo asumiu o desenvolvemento do Parque Empresarial de Tomiño o pasado mes de marzo, tras unha reunión celebrada en Madrid coa sociedade pública Suelo Empresarial del Atlántico (SEA), inicialmente encargada do desenvolvemento desta actuación. | 
