| |  | | | | | Princesa e Farruca, dous dos animais vÃtimas da Atrazina. REMITIDA. | | | |
Xa é oficial. Segundo o informe do Hospital Veterinario Universitario Rof Codina de Lugo, nas mostras dos tres animais que se enviaron a este centro encontráronse restos do herbicida Atrazina, "que os animais puideron haber inxerido ó comer herba ou algún alimento impregnado con dita substancia", confirma o concelleiro de Medio Ambiente do Concello de Salceda, Enrique Cabaleiro. Estes resultados xa se puxeron en coñecemento das autoridades, "a fin de poder determinar se o envelenamento dos animais foi unha cuestión de índole accidental ou voluntaria", engade.
Cabaleiro adiantaba a VM o resultado da autopsia o pasado martes, que naqueles momentos non era oficial, onde dicía que a Atrazina é "unha substancia altamente tóxica e que en países como Alemaña, Suecia e Dinamarca está prohibida a súa comercialización". Un total de 12 animais foron afectados, precisamente 11 cans e 1 gato, apareron mortos a principios do mes de abril, nos barrios do Torrón e Pedra Carballa. Os propietarios dos animais mortos, de todos modos, xa teñen coñecemento da substancia que matou os seus cans e gatos.
Cabaleiro sinala agora habería que identificar "se pode venderse en España e, de non ser así, se foi comprada en Portugal". De todos modos, o concelleiro de Medio Ambiente considera "moi complicado" identificar en que establecemento se comprou o produto.
Ós animais expostos a este tipo de substancia, segundo a Axencia para Substancias Tóxicas e o Rexistro de Enfermidades dos Estados Unidos, observouse danos do fígado, ril e corazón e tamén demostrouse que produce alteracións hormonais que afectan a ovulación e a capacidade para reproducirse.
A Atrazina é un herbicida artificial utilizado para controlar o crecemento das malas herbas na agricultura. Aínda que ten un baixo nivel de bioacumulación nos peixes é altamente persistente no solo, ata un ano, o que pode provocar contaminación das augas subterráneas que estean máis preto. "A xente ten a costume de ir ao máis cómodo, ou sexa, utilizar herbicida en vez de cortar a herba", afirma o concelleiro de Medio Ambiente. De feito, lembra Cabaleiro, "hai persoas que teñen leiras preto do río e tivemos algunha denuncia nese sentido, aínda que non houbo sancións fomos falar cos veciños para que non utilizaran herbicidas".
|
