|
A Concellería de Voluntariado está a desenvolver o primeiro Banco de Alimentos do Concello de Salceda de Caselas, que ten o propósito de distribuír alimentos de primeira necesidade ós casos derivados dos servizos sociais ou a persoas que veñen por iniciativa propia. A concelleira, Mónica Vizcaya, sinala que "é moi importante que nesta situación de crise que estamos a vivir, as institucións se acorden dos máis desfavorecidos". Mentres, o alcalde, Marcos Besada, salienta que conseguíronse sete mil quilos gracias ó Fondo Español de Garantía Agraria mediante a Cruz Vermella. Destaca tamén a importancia e esforzo da concelleira por entrar neste tipo de programas e comunica que "recibiremos máis na data de setembro xa que son tres entregas ó ano".
Consideraranse como beneficiarios da axuda a todas aquelas persoas ou grupos familiares en precaria situación económica, que teñan dificultade de acceso ós medios básicos de supervivencia. Darase prioridade a aqueles individuos ou grupos familiares especialmente vulnerables pola súa dificultade para afrontar por si mesmos a situación de precariedade na que se atopen, como son: grupos familiares con nenos e/ou anciáns ó seu cargo, familias monoparentais, diminuídos físicos, psíquicos ou sensoriais, persoas incapacitadas para o traballo ou incursas en toxicomanías ou sida, menores en situación de desamparo, mulleres maltratadas, minorías étnicas, inmigrantes, refuxiados, asilados, exreclusos, transeúntes e anciáns perceptores das pensións máis baixas.
Os alimentos consisten en galletas, pasta alimenticia, produtos lácteos, etc., procedentes das existencias de excedentes comunitarios de produtos de intervención (arroz, manteiga, leite en po, etc.). As cantidades distribuiranse ós beneficiarios en función da necesidade tanto do numero de persoas da unidade familiar como das rendas da unidade. Esperase proporcionar alimentos de primeira necesidade a máis de 60 familias ó mes.
Para ser beneficiarios do Banco de Alimentos é necesario estar empadroados con residencia efectiva no Concello (exceptuando a transeúntes) e non superar os ingresos establecidos no baremo segundo o numero de membros que integran a familia ou casos derivados directamente polos servizos sociais do Concello.
Trala recollida de documentación o equipo técnica fará valoración e ós beneficiarios entregaráselles un carné numerado para a recollida de alimentos o día que se determine. Farase unha única entrega por mes ata o mes de setembro que serán levadas a cabo polo grupo de voluntarios do Concello de Salceda de Caselas inscritos para tal fin.
|
