O eurodeputado do Partido Popular, Francisco Millán Mon, estará este martes en Salceda

O Partido Popular de Salceda de Caselas organiza, ao abeiro da campaña electoral ao Parlamento Europeo, unha charla-coloquio presidida polo eurodeputado galego Francisco Millán Mon. A cita terá lugar o vindeiro martes, 26 de maio, a partir das 20.45 horas no Centro Social Devesa, onde estará acompañado da presidenta e do vicepresidente da Xestora local, Emma Pereira e Santiago Rodríguez, respectivamente.

O obxectivo da xornada é explicar os diferentes puntos do programa electoral do Partido Popular e establecer un diálogo distendido con todos os salcedenses no que estes poidan formular as súas dúbidas e inquedanzas.

Previamente, arredor das 19.30 horas, o candidato ao Parlamento Europeo nas próximas eleccións do 7 de xuño, fará un pequeno recorrido polo centro da vila, acompañado dos concelleiros populares e dos diferentes membros da Xestora.