|
Comezaron as obras de limpeza e desbroce do río Caselas, en concreto no tramo da parroquia salcedense de Entenza entre a Área Recreativa de "Agüin" e a do Manteiro. Estas obras teñen por finalidade preparar esa zona do río para a posterior execución da senda peonil que se vai a levar a cabo nese tramo, e que se enmarca dentro do convenio que no seu día firmaron o Concello de Salceda de Caselas e a Consellería de Medio Ambiente e Desenvolvemento Sostible, polo que a Consellería financiaba a totalidade do importe de esta actuación, que conta cun orzamento de 84.000 euros.
O concelleiro de Medio Ambiente e Desenvolvemento Sostible do Concello de Salceda, Enrique Cabaleiro, manifestou nun comunicado que, ademais da limpeza de esta zona do río Caselas ó seu paso por Entenza, tamén se vai a levar a cabo a limpeza do cauce de este mesmo río nos tramos que comprenden a parroquia de A Picoña e San Xurxo.
As citadas obras de limpeza e desbroce están a ser efectuadas pola Confederación Hidrográfica Miño–Sil tralo compromiso acadado polo presidente da Confederación, Francisco Fernández Liñares, o alcalde de Salceda de Caselas, Marcos Besada, e o concelleiro de Medio Ambiente, Enrique Cabaleiro, tras unha reunión mantida na sede da Confederación en Ourense.
Segundo Enrique Cabaleiro, o presidente da Confederación Hidrográfica Miño-Sil "nos comunicou que ese Organismo ademais da citada obra levará a cabo tamén no Concello de Salceda e dentro das obras do Plan "E" de fomento e estímulo do emprego do Goberno Central, se executarán tamén obras de limpeza e desbroce nos cauces do río Landres nas zonas de Parderrubias, Pedracarballa e Entenza e nos arroios da Fraga e San Xusto, ambos na Parroquia de Entenza. A totalidade do orzamento que a Confederación Hidrográfica Miño-Sil vai a levar a cabo na limpeza dos citados cauces fluviais no Concello de Salceda de Caselas ascende a 124.457 euros.
|
