|
O Concello de Ponteareas celebrará o vindeiro mes de setembro a trixésima novena edición do Concurso de Gaitas, no que poderán participar tódolos grupos de gaitas de Galicia coma dos Centros Galegos de España e do estranxeiro que toquen con gaita tradicional. O concurso terá lugar na vila de Ponteareas os vindeiros 20 e 21 de setembro. Antes das 13.00 horas do vindeiro 12 de setembro deberán presentarse as solicitudes de inscrición para o certame, totalmente gratuíto, no rexistro de entrada do Concello. As bases e o modelo de inscrición poden consultarse na páxina web do Concello de Ponteareas ou ben solicitarse no Departamento municipal de Cultura (986 661 675).
O concurso establece catro premios cunha contía total de 4.500 euros: un premio de 1.800 euros para o primeiro clasificado, 1.200 para o segundo, 900 para o terceiro e un carto premio de 600 euros. O xurado estará composto por Iván Costas Blanco ( mestre de música tradicional e gaiteiro ), Antonio Gutiérrez Pereira (mestre de música tradicional, director da Banda de Gaitas Tremiñado e gaiteiro ), José Manuel Gil Rodríguez (mestre de música tradicional, artesán e gaiteiro), Anxo Lois García Pintos (mestre de música tradicional e gaiteiro, e Manuel Alonso Iglesias (Percusionista).
|
