Vázquez ao corrente dos principais problemas en materia educativa dos centros escolares mosenses

A alcaldesa de Mos e a edil de Educación entrevístanse co conselleiro Jesús Vázquez Abad. REMITIDA.

A alcaldesa de Mos, Nidia Arévalo, e a concelleira de Educación, Julia Loureiro, reuníronse onte co conselleiro de Educación, Jesús Vázquez Abad, nas dependencias da Xunta de Galicia en Santiago.

Á saída da entrevista a rexedora local informou de que, durante a mesma, lle trasladaron ó conselleiro a problemática xeral dos centros educativos municipais, tanto dos colexios coma do instituto. Alcaldesa e concelleira fixéronlle a Vázquez Abad un avance de tódolos problemas que ten o Concello en materia de Educación, tanto no que respecta ó transporte escolar coma a outros ámbitos, entre os que se atopa a necesidade da acometida de certas obras para a mellora dos centros.

Por outra banda, Nidia Arévalo convidou esta mañá a Jesús Vázquez “a vir cando queira a Mos a coñecer os centros escolares do municipio e sobre todo o novo colexio Mestre Martínez Alonso de Castro-Mos”; ó que o conselleiro respostou anunciando que virá a visitar o centro antes de que remate o presente ano 2009.

Arévalo e Loureiro declararon, tras a reunión co conselleiro de Educación, que lle estableceron a este como prioridades para Mos a mellora do funcionamento do transporte escolar e obras para os centros educativos, concretamente de ampliación de comedores, optimización de ximnasios, aislamento das dependencias, renovación de portas e ventás, mellora das fachadas e un longo etcétera.

A rexedora municipal anunciou que algunhas destas obras se acometerán o vindeiro ano e outras quedarán para os seguintes, “xa que é comprensible que non se poidan facer todas á vez”, dixo. Sen embargo, declarou que “espérase alguna obra importante en Mos en materia de Educación para o ano que ven”.

Segundo a alcaldesa mosense “o conselleiro amosouse voluntarioso respecto das nosas solicitudes e comunicounos que en breve nos informará da cantidade económica que a consellería de Educación vai investir en Mos o vindeiro ano 2010 para solventar os problemas que hoxe lle trasladamos”.