|
Os veciños de Sabaxáns (Mondariz) organizan mañá 25 de maio unha subida reivindicativa a Cotodeira. Esta camiñata (media camiñata en realidade porque boa parte do percorrido farase en coche) comezará ás 16.30 horas e durará unha hora.
O obxectivo desta camiñata é dar a coñecer o único foxo do lobo dobre de Galicia, que os veciños califican de "un extraordinario ben patrimonial" que non figura no Catálogo de Bens Culturais do Concello de Mondariz.
A camiñata é organizada polos veciños da parroquia de Sabaxáns e conta coa colaboración do grupo ecoloxista Adenco. Haberá saída simultánea en coches particulares dende as igrexas parroquiais de Sabaxáns e Mondariz. | 
