|
O Concello de Covelo vivirá este domingo día 4 de maio a tradicional e multitudinaria romería da Virxe da Xestosa, considerada como un dos actos relixiosos máis importantes no municipio. A romería da Xestosa celébrase na capela do seu mesmo nome, que se atopa encravada na paraxe do monte Faro de Avión, cota máis alta da provincia de Pontevedra e que fai límite coa provincia de Ourense.
O presidente da Xunta de Montes de San Salvador de Prado, José Muradás, conta que a capela construíse en duas fases polos veciños de Prado, a última pedra foi colocada no ano 1811 e conta cunha longa tradición milagreira. Os máis maiores da zona dín que o lugar ten efectos milagreiros no tratamento e cura de verrugas da pel e todo o relacionado cos malestares do corpo humán. “Dín, e isto é verdade, que frotando a pel afectada con pan, previamente mollado en auga estancada no sarcófago que existe no recinto do santuario, as lesións cutáneas desaparecerán transcorrido un tempo”.
A imaxe da Virxe da Xestosa desfila nunha procesión dende a igrexa parroquial de Prado percorrendo uns cinco quilómetros nunha caravana adornada previamente con flores naturais da zona. No lugar coñecido como Fonte Ronda, próximo á capela, terá lugar o encontro entre a Virxe que accede dende a igrexa parroquial e a Virxe que se atopa todo o ano na capela da Xestosa.
As misas na igrexa parroquial comezarán ás 09.00 horas, logo será a misa solemne con procesión ás 10.00 horas, seguindo con outra misa ás 11.00 horas e ás 12.00 horas. Ás 13.00 horas haberá misa con procesión.
|
