|  | | | | | As obras de acondicionamento e asfaltado da estrada do barrio de Carballeda, feitas polo concello, 'están a destruir' o Patrimonio de Covelo. | | | |
A Asemblea do Suído denunciou onte que o concello de Covelo está a destruir unha cruz de pedra e extrae de “xeito ilegal” terra do Castro de Covelo, no transcurso das obras de acondicionamento e asfaltado da estrada do barrio de Carballeda.
Segundo o comunicado enviado pola entidade, os feitos xa foron denunciados ante a consellaría de Cultura e Deporte e ante a consellaría de Medio Ambiente e
Desenvolvemento Sostíbel.
Para a Asemblea do Suído estes feitos poñen de manifesto “a falla de interese” pola conservación do patrimonio, tanto natural como cultural, do concello de Covelo e a súa “falla de planificación”, caracterizada polo rumbo “errático e a improvisación”.
Concello
O tenente alcalde de Covelo, Pablo Castillo, sinalou que as obras de acondicionamento e asfaltado na estrada do barrio de Carballeda eran “moi demandadas” polos veciños “dende máis de 20 anos”. Pero manifestou que dende o concello xa se enviou unha notificación à Deputación de Pontevedra, encargada das obras, para “solicitar” a reparación da devandita cruz. Mentres iso non ocorre, o concello decidiu gardar as pedras no almacén municipal. Por outra banda, adiantou que se pretende acondicionar a zona facendo tamén unha fonte, “como o pediron os veciños”.
De todos modos, e non querendo restar importancia os feitos, o tenente alcalde dixo que o concello está “moi preocupado” coa futura instalación de canteiras que a consellaría de Industria “está tramitando” facer “no corazón” da Serra do Suido, precisamente no Foso do Lobo. |
