A exposición Galicia Dixital achega os últimos avances tecnolóxicos ata A Cañiza

A exposición ofrece unha converxencia entre arte e tecnoloxía e achega o audiovisual e os multimedia á cidadanía, como estes nenos do CPI da Cañiza. REMITIDA.

Achegar os últimos avances tecnolóxicos ao concello da Cañiza. Este é o obxectivo da exposición itinerante 'Galicia Dixital', cuia inauguración tivo lugar hoxe pola mañá e na que estivo presente o subdirector xeral de Telecomunicacións e Audiovisual, Manuel Conde Mouzo. No acto participou ademais o alcalde da localidade, César Xosé Mera Rodríguez, e un grupo de rapaces do CPI da Cañiza.

Conde Mouzo dixo que a Secretaría Xeral de Comunicación márcase dous obxectivos coa exposición. Dunha banda, "conseguir que os visitantes disfruten cunha experiencia nova e diferente á dos museos convencionais ao coñecer as novas tecnoloxías aplicadas ao mundo audiovisual de xeito lúdico". En segundo lugar, "a mostra serve de escaparate e ponte natural entre o traballo que están a desenvolver as universidades e as empresas galegas co resto da sociedade".

Así mesmo, o subdirector xeral sinalou que a mostra está pensada para que os seus visitantes non sexan simples espectadores, senón que participen en todo o seu percorrido, "o que fai que sexa de grande interese didáctico para as persoas de todas as idades".

A exposición ofrece unha converxencia entre arte e tecnoloxía e achega o audiovisual e os multimedia á cidadanía, servindo de plataforma de experimentación de novos sistemas e contidos audiovisuais realizados por empresas e universidades galegas. As novas tecnoloxías introducen ao visitante nunha atmosfera especial que amosa unha Galicia diferente, unha viaxe de sensacións, imaxes, luces e sons que envolven ao visitante e que lle permiten gozar dunha experiencia nova e divertida. A exposición ofrece proxeccións e xogos en 3 dimensións, un tiraboleiro virtual, unha viaxe aérea pola nosa comunidade, e o can de fala galega Axóuxere, entre outros.

A exposición 'Galiciadixital', de entrada gratuíta, estará na Casa do Concello da Cañiza ata o 1 de xuño, con horario de 10.00 a 14.00 e de 16.00 a 20.00 horas. A mostra presentada na Cañiza é unha réplica da exposición permanente 'Galiciadixital' situada no Mosteiro de San Martiño Pinario de Santiago de Compostela pola que xa pasaron máis de 450.000 visitantes.