Onte sábado apresentou-se públicamente em conferência de imprensa o "grupo promotor" do que será a genuina candidatura do povo trabalhador ao Concelho de Ponte Areas, Ponte Areas de esquerda.

Abraám Alonso, acompanhado por cinco vizinh @s de Ponte Areas deu a conhecer no acto público de apresentaçom realizada no Local Social Baiuca Vermelha o perfil político da candidatura e os objectivos que persegue.

Ponte Areas de esquerda é umha candidatura da esquerda soberanista que tem como objectivo imediato contar com representaçom no Concelho de Ponte Areas.

Abraám Alonso, que agiu como portavoz, manifestou-se rotundo e convencido de que que vai haver umha mudança no governo municipal de Ponte Areas pois "por primeira vez na história mais recente, desde a Transiçom é possível um governo "progressista", umha alternativa à direita representada polo PP e à extrema-direita da UCPA no Concelho de Ponte Areas de maneira natural e sem carambolas".

Ao longo da sua intervençom fijo fincapé na imprescindível necessidade de que Ponte Areas de esquerda entre no Concelho para ser a chave na mudança do governo municipal, pois Ponte Areas de esquerda será a "única garantia para que a política aplicada polo BNG-PSOE seja verdadeiramente de esquerda e ao serviço da maioria social do concelho, para que executem o programa eleitoral sobre o que se apresenteam e nom umha repetiçom fraudulenta do que estam a fazer na Junta da Galiza: um política continuista e ao serviço dos de sempre".

Por este motivo e perante as tentativas de disvirtuar os objectivos da candidatura que recolhe no seu projecto umha rica pluralidade ideológica e diversas experiências e trajectórias Abraám Alonso insistiu na necessidade de que "o voto útil para a mudança real em Ponte Areas é apoiar a lista da esquerda plural e unitária representada por Ponte Areas de esquerda , pois no nosso seio recolhem-se diversas tradiçons do movimento popular".

O candidato do BNG à presidência da Cámara de Ponte Areas, Roberto Mera, nom ficou fora das análises críticas de Ponte Areas de esquerda. Abraám Alonso dirigindo-se à base social e popular que apoia eleitoralmente o Bloque definiu a Mera como umha pessoa que "nom é de fiar" pois depois de ter encabeçado na XI Assembleia Nacional do BNG umha lista alternativa denominada dos "nom adscritos", para tratar de mudar o rumo e regenerar o BNG e aprofundar na sua democratizaçom contra o dirigismo, atraiçoou ao pouco tempo os objectivos e as pessoas que tinham confiado nele ao aceitar um "postinho" de Responsável de Política Municipal pactuando com Quintana e a UPG, os anteriores inimigos a bater, e entrando a formar parte da Executiva Nacional.

Para Ponte Areas de esquerda isto manifesta que é "um oportunista, um virachaquetas, umha pessoa de ambiçom desmedida, que tam só aspira a fazer carreira política carecendo dos mais mínimos escrúpulos e ideais para atingir os seus objectivos".

Portanto, segundo Abraám Alonso se "Roberto Mera se vendeu por um prato de lentilhas a cámbio de um postinho na Executiva Nacional do BNG, que garantias oferece de nom vender-se também em Ponte Areas aos interesses de Regino, Bouzó, Olímpio, Rivera... e demais poder empresarial local por favores que redundem em benefício da sua carreira política?".

Antes de concluir a conferência de imprensa Ponte Areas de esquerda deu a conhecer as ideias força do seu programa eleitoral e as características dumha candidatura composta por vizinhas e vizinhos de "esquerda e incorruptíveis" , por trabalhadoras e trabalhadoras, por desempregad @s, por jovens, mulheres, que ao igual que a maioria da populaçom "nom vam atraiçoar a ninguém e que temos a firme determinaçom de pôr ao Concelho ao serviço da maioria social, das pessoas que ganhamos o pam com o suor da nossa fronte, das e dos que para viver ao dia, dia após dia, padecemos na nossa pele exploraçom e precariedade laboral, exclusom social, falha de serviços e de oportunidades para umha vida digna. Nom somos "uns mais chupar do bote". Seremos a voz e a força da classe trabalhadora no Concelho de Ponte Areas" .

Abrám Alonso manifestou que Ponte Areas de esquerda é consciente da nova realidade à que está sujeita a vila com a chegada de pessoas que provenhem doutros países, o que som as novas e novos ponteareans. Por este motivo a comunidade imigrante vai estar representada na candidatura e Ponte Areas de esquerda e @s representantes municipais desta candidatura vam fazer que o Concelho facilite a sua integraçom e vele polos seus direitos numha situaçom de fragilidade e vulnerabilidade.

Finalmente, depois de agradescer aos meios presentes no acto, às amigas e amigos a assistência à conferência de imprensa, os apoios e adesons recolhidas para este histórico passo, Ponte Areas de esquerda manifestou que manterá constantemente informada ao conjunto da populaçom de todas as iniciativas e passos que realizará até conformar a chave da alternativa progressista e nacional que representa.